Cola i vua e Vanuakula

A MAI kumuni rawa e $5000 vakacaca era mai cau kina na matalotu Katolika ena nodra soqo mai Vanuakula, Naitasiri.
Era mai marautaka na matalotu Katolika ena nodra rawa ni mai veisotari tale ena nodra mai kumuni i lavo me baleta na nodra valenilotu e Vanuakula.
E vakaraitaka ko Marino Nawa, na i liuliu ni komiti ka qarava na soqo ni kumuni ni lavo, ni nakinaki tikoga na parisi e Vanuakula ena nodra vakatorocaketaki na cakacaka ni lotu.
“Na soli e mai vakayacori e kena i naki ga me veivuke tiko ena kena vakavinakataki na veiqaravi ni lotu ena neimami koro ni lotu qo e Vanuakula,” e kaya o Nawa.
“E sa tiko na neimami gagadre ena kena nanumi tiko me na dua na neimami koronivuli na ‘secondary’ e Vanuakula ka me rawarawa na nodra biubiu tikoga mai na gonevuli ena paraimari ka ra mai vuli sara ena neimami sekenari.”
E na gauna qo era dau cava mai na nodra vuli na gone ena paraimari era qai dau gole yani ki na veikoronivuli sekenari e Suva, Cawaci sara ki Levuka kei na veikoronivuli tale eso.
E kuria na turaga yabaki 54 qo ni sa tiko talega na nodra nakinaki me na dua na vale ni soqo ni koro ni lotu kei na kena vakavoui na i tikotiko ni lotu ena kena viribai vakamatau.
“E nanumi talega me na vakavinakataki na vale nei turaga bete ena neimami koro ni lotu ka sikovi talega yani eso na vanua e na loma ni yasana ena kena vakatetei tiko yani na i tukutuku ni lotu.”
Na kumuni soli a mai vakayacori rawa ena Vakaraubuka sa oti era mai dolava rawa na marama lotu Katolika ena yasana o Naitasiri ka ra qai mai sogosogo na turaga.
E ratou mai vakatara tale tikoga ena soqo lagilagi qo na matasere rogo ni noda vanua na Seniboro Juniors ka ratou cavutu mai na koro vakaturaga o Sawanikula ena loma ni vanua na Wainimala. Ia, e vakadeitaka o Nawa ni sa lokuci oti talega na vula me na vakayacori tale kina e dua na kena tausoli ka salavata kei na dua na sotasota ni rakavi lewe ya vitu me na rawa ni vakabulabulataka vakalevu na nodra mai tiko rawa na tabagone ena nodra rawa ni mai veivuke tiko ena sasaga yaga ni qaravi ni lotu.
“Sa lokuci tiko na Okosita ni yabaki tikoga qo me sa na vakayacori tale tiko kina na soli kei na dua na sotasota ni rakavi lewe ya vitu kei na nodra qito na goneyalewa,” e kaya o Nawa.
E namaki tiko ni na rabailevu sara na kumuni soli ena Okosita ni na lala mai na loma ni vanua na Wainimala, Wainibuka, Waidina kei na Waimanu ena nodra mai duavata tiko na kena colati tikoga nai vua ni qaravi tavi ni lotu ena loma ni tikotiko ni lotu e Vanuakula.