Cava vinaka mai Canada

NA nona mai qaqa na timi ni Fiji Airways Fiji 7s ena 31 kei 12 vei Kenya ena fainala levu ni HSBC Canada Sevens ka ratou sega vakadua ni bau druka ena dua na nodratou qito e vakavuna me ratou mai cabe cake kina i karua ni itutu ena tuvatuva ni poidi, ena nodratou vakalutumi Niu Siladi ena i katolu ni itutu.

Oya esa qai matai ni gauna me qaqa kina o Viti ena qito mai Vancouver ka i ka 33 ni nodratou qaqa ena 66 na gauna e ratou cabeta kina na fainala ni bilo.

Na nodrau mai fainala o Viti kei Kenya esa i karua ni gauna me rau veiqali sominiwai kina na timi e rua ka ni rau a qito vata ena Tobu C ena i matai ni siga ni qito. A nona na kalougata na timi ni Viti ena nodratou qaqa ena dua na kai veivolekati ena 24 kei 21.

Ia, na fainala ena karua ni siga e a qaqa kina o Viti vei Argetina ena 43 kei 7 ena kota fainala, 15 kei 12 ena semi fainala kei Sauca Aferika. Ia, ena sota levu ni fainala a tabaka e liu na sikoa o Kenya mai vei Willy Ambaka, ka mani ravu lesu tale kina o Viti ena nona tabaka e dua na sikoa o Josua Vakurunabili ia ni voleka ni cava nai matai ni veimama e rau a yadua tale na sikoa na timi e rua ka rau mai tai kina ena 12 kei 12 ni vakacagicagi na qito ni oti nai matai ni veimama.

A nei Viti na karua ni veimama ena nona tabaka rawa tale e tolu na sikoa, a mai nei Sevuloni Mocenacagi na i covi ni dauqito vinaka ena fainala (HSBC Player of the Final) ena nona tabaka rawa e rua na sikoa.

Ni mai vakatagica oti o revari nai otioti ni sici e Canada e a tarai sara vakabibi na lomai Gareth Baber na dauniveivakatavulici ni timi ni Viti ena kaukauwa ni qito e ratou vakaraitaka na nona cauravou ena loma ni rua na siga.

E tukuna o Baber ni ratou sa mai rawata rawa nai covi e Canada ka sa mai tekivu talega e kea na nodratou vakanamata sara kina qito levu ena vakayacori tiko mai Hong Kong ena vula mai oqo.