ENA vulagi dokai tiko ena kena dolavi na Bose ni Yasana o Tailevu na i liuliu ni matanitu, o Voreqe Bainimarama.
Vakadeitaka na i tukutuku oqo na jemeni ni matabose ni yasana o Turaganiovisa Rusiate Tudravu.
Vakaraitaka ni dua na vuli ena vakayacori tiko ena siga nikua ( Vukelulu) dra vuli mai vei ira na i vakailesilesi ni Tabacakacaka i Taukei.
“Ena siga Lotulevu ena dolava tiko kina na Paraiminisita na bose, ka ra na vakaitavi talega ena siga oya o ira na mata mai na veitabana ni matanitu ena vuku ni veiqaravi ena loma ni yasana.
“E namaki me na bosei talega e vuqa sara na veika me baleta na veivakatoroicaketaki kei na bolebole e sotavi tu,” e kaya.
Vakadeitaka o Tudravu ni dua na ka e kauwai talega kina na i wiliwili ni lewe ni yasana era sa vesuki tu vakalawa.
“ Ena qai macala na cava ena cakava na matabose ni oti na nodratou solia mai na nodratou ripote na komiti digitaki, ka me na qai macala na cava na ka ena vakayacori ena vuku ni tikina oqori,” vakadeitaka o Turaganiovisa Tudravu.
E mai digitaki me mai liuliu ni bose ni yasana o Tudravu mai na Matabose ni Veika Vakaitaukei ka me na cici tiko na nona konitaraki ni veiliutaki ena loma ni rua veimama na yabaki.
Ena vakayacori tiko na bose ena koro vakaturaga mai Nauluvatu e Nakelo ena rua na siga, Lotulevu kei na Vakaraubuka ni macawa oqo.
